skip to content

Хоць бы што калі якое!..

Хоць бы што калі якое!
Немата і пустата,
За вакном ганяе нехта
Беспрытульнага ката.

А вясна — вясна на дзіва,
Дзе ні глянь яе рука:
Вось сяброўка йдзе на піва
Да знаёмага грака.

Грак той, зрэшты, сімпатычны
I наогул ён не грак...
I чаму неэстэтычна
Я аб ім сягоння так?

Мітусня. Пагром. Суседзі
Пацягнуліся у блуд.
На другім паверсе недзе
Гамана і перапуд.

Толькі я свайго засценку
Не жадаю пакідаць:
Мне глядзець карысна ў сценку,
Я павінна сумаваць.

Вольга Ласаева